Mahana maha i te 17 no fepuare 2022 – Faaoti hia i roto i te apooraa rahi o to tatou fenua i nanahi ra na roto i te faaotiraa o te pae rahi o te tapura huiraatira i ta ratou tata’iraa ture no te faautuaraa i te mau taata rave ohipa tei ore e faatura i te ture faaheporaa patia arai i nia i te faito moni 50 000 farane.
Ua mana ia te reira na roto i te maitiraa o na 37 mero no te tapura huiraatira. Ta ratou opuaraa ture i te haamataraa, te faatoparaa i nia i te 80 000 farane. Muri mai te hoe faahou opuaraa tata’i faahou i te faito moni 50 000 farane. No te toofa Lana Tetuanui, aita oia i tapea noa i nia i ta na opuaraa tataeraa ture e faaore roa te faautuaraa. Ua turu atoa oia i teie faatoparaa 50 000 farane. Area no te toe’a o te mau mero o te tavini huiraatira, to te tahoeraa e to Ia here ia Porinetia, ua turu noa ratou i te opuaraa ture a Lana Tetuanui, faaore roa teie faautuaraa. Mai te omua raa mai teie mau pupu porotita i te patoi raa i teie faautuaraa 175 000 farane. Teie mai te tahi manao o Tony Geros no te pupu Tavini huiraatira tei tapea hia mai.
Te peapea nei te tia o te Tavini huiraatira i nia i teie faanahoraa faaheporaa i te taata ia haere e patia ia ratou, ia vaiho hia te tiamaraa o te taata ia haere e patia ia ratou, ia faatura hia tiaraa mana o te taata. Te peapea atoa nei oia no tona huiraatira no Paea i mua i teie mau faaheporaa, ia tupu noa atu te hoe fifi i nia i tona huiraatira na roto i te faaheporaa i te patia arai e tuu atu oia i te reira ohipa i mua i te tiripuna. Teie mai tona manao tei tapea hia mai .